Höfundur: Björn Erlingsson

Í þessari bók kemur gamalt sveitafólk við sögu sem kann þá list besta að lifa í sátt við Guð og menn. Við landið, veðráttuna og unga fólkið sem oftast er í kapphlaupi við tímann, án þess að vita með vissu í hverju keppnin er fólgin. En gamla fólkið heldur sínu striki. Fer með bænir að kvöldi og lofar góðan dag að morgni.

Ljóðin, líkt og ljósmyndirnar hefur höfundur fangað á fáeinum augnablikum milli stríða, í önnum dagsins. Og fátt heillað hann meira en birta landsins, fegurð þess og deyjandi kynslóð sveitafólks sem ræktað hefur jörð sína af alúð og uppskorið hófsamt líferni.

Stofuklukkan

Á veggnum hangir gömul klukka
sem gengur í takt við tímann.
Hins vegar er gamla konan
sem fékk hana eitt sinn í tanngjöf
fyrir löngu hætt að fylgja þessu fyrirbæri.

Hún kippir sér ekki upp við það
þótt stöku sinnum
falli slög úr
hennar eigin hjartslætti.

Áhyggjulaus situr hún
og teygir lopann
til að nálgast endann
sem enginn sér þó fyrir.